Durante séculos millóns de peregrinos teñen viaxado cara o oeste seguindo un dos camiños culturais máis importantes do mundo: o Camiño de Santiago. Nos últimos anos a tradición foi cambiando e os peregrinos continúan a súa viaxe máis alá do seu destino inicial,  na procura do Atlántico, ao que atopan na “fin da terra”. As JAEM, seguindo a senda dos peregrinos, continúan viaxando cara o oeste, camiño do Atlántico: Mallorca, Cartagena, Madrid e, agora, A Coruña.

​

Esta fermosa cidade, practicamente rodeada polo océano, foi elixida pola FESPM como sede da 19ª edición das JAEM, que terá lugar entre o 3 e o 6 de xullo de 2019. En AGAPEMA somos coñecedores da enorme responsabilidade que supón a organización das JAEM, traballo ao que nos enfrontamos cunha actitude e unha idea presente en todas as nosas actividades e accións: sumar.

​

Sumar ilusión, combustible imprescindible para facer funcionar unha maquinaria tan complexa como a que necesitaremos para organizar este evento.

​

Sumar esforzos, sabendo que só acadaremos o noso obxectivo co traballo de moitos, valorando a importancia de cada aportación, por pequena que poida parecer.

​

Sumar ideas, sendo conscientes de que con elas somos quen de cambiar a realidade educativa dos nosos centros e, o que é máis importante, do noso alumnado.

​

Sumar persoas, profesoras e profesores implicados na mellora da educación matemática. De cada unha delas será o mérito de ter conseguido facer das JAEM  de A Coruña un encontro fructífero e inesquecible.

​

Sumar a vosa participación, compartindo momentos cos compañeiros e compañeiras que chegarán a Coruña para ensinar, aprender e colaborar, intercambiando experiencias, proxectos, recursos, vivencias, etc.

​

Confiamos en que a suma destes elementos, e dalgún outro non menos importante, como a hospitalidade de A Coruña, a amabilidade das súas xentes, o océano que a envolve, farán das 19 JAEM un encontro satisfactorio e inesquecible, tanto dende o punto de vista profesional como persoal.

​

Dende AGAPEMA invitámosvos á Coruña, a convertervos nunha peza máis dese gran mosaico que serán as 19 JAEM.